Oliy ta’lim, fan va innovatsiyalar vaziri Qo‘ng‘irotboy Sharipov Hay’at yig‘ilishidan so‘ng Jizzax politexnika institutida o‘tkazilgan Navro‘z bayrami tadbirida ishtirok etdi. Bahoriy ruhda o‘tgan tantanada oliy ta’lim muassasalari rahbarlari, professor-o‘qituvchilar va talabalar ham qatnashdi. Tadbir davomida milliy qadriyat va an’analarni aks ettiruvchi arqon tortish, kamondan o‘q uzish, shaxmat, shashka, stol tennisi kabi sport o‘yinlari, milliy raqslar, kuy-qo‘shiqlar va laparlar namoyish etildi. Bayram ishtirokchilarga yuqori kayfiyat va unutilmas taassurotlar ulashdi.