“Yashil iqtisodiyot va taraqqiyot”, shuningdek, “Muhandislik va iqtisodiyot” ilmiy jurnallari tahririyati muharriri Sh. Qurbоnov ilmiy hamkorlik doirasida Prezidentimiz tashabbusi bilan tashkil etilgan Jizzax politexnika institutining Muqobil energiyalarni tadqiq etish ilmiy-amaliy markazida bo‘ldi. Tashrif davomida mehmonni institutning ilmiy ishlar va innovatsiyalar bo‘yicha prorektori J. Abdunazarov kuzatib bordi. Sh. Qurbоnov ilmiy-amaliy markaz faoliyati, unda ishlayotgan talabalar ishtirokidagi innovatsion jarayonlar va istiqbolli loyihalar bilan tanishdi. U loyihalarni ilmiy metodik ta’minlash masalasida fikr almashdi. Xususan, ilmiy-amaliy markaz bugungi kunda quyosh panellarini mahalliylashtirish va ishlab chiqarishga yo‘naltirilgani sababli, bu yo‘nalishda yanada ilmiy tadqiqotlar olib borish uchun jurnal bilan samarali hamkorlikni yo‘lga qo‘yishga kelishildi. Bundan tashqari, dual ta’lim hamda ilg‘or muhandislik maktablarini faol integratsiyalash bo‘yicha hamkorlik chora-tadbirlari ishlab chiqildi.