Bugun, 5-mart kuni Jizzax viloyatida Jizzax yoshlar texnoparkining ochilish marosimi bo‘lib o‘tdi. Texnoparkning tantanali ochilish marosimida Jizzax viloyati hokimi o‘rinbosari Akmal Savurbayev, Innovatsion rivojlanish agentligi direktori Sharof Rajabbayev, Oliy ta’lim fan va innovatsiyalar vazirligi Jizzax viloyati hududiy boshqarmasi boshlig‘i Sirojiddin Tavbayev, viloyatdagi oliy ta’lim muassasalari rektorlari, professor-o‘qituvchilar, ilmiy izlanuvchilar, talabalar, OAV xodimlari hamda keng jamoatchilik vakillari ishtirok etishdi. Ma’lumot uchun, texnopark yiliga 500 nafar axborot-kommunikatsiya texnologiyalari sohasiga qiziquvchi yoshlarni veb-dasturlash, robototexnika, 3D modellashtirish, grafik dizayn, veb-dizayn, mexatronika, startaplar bilan ishlash kabi 10 dan ortiq yo‘nalishlarda o‘qitish imkoniga ega. Innovator yoshlarning g‘oyalarini prototip darajasigacha yetkizishga ko‘mak beruvchi texnoparkda, kichik ishlab chiqarish zonasi orqali tayyor loyiha g‘oyalarining prototiplarini bepul ishlab chiqarish imkoniyati mavjud. Ochilish marosimida so‘zga chiqqanlar Jizzax yoshlar texnoparki hududning intiluvchan, aniq maqsadli, g‘oya va tashabbuslarga ega yoshlarini yangidan-yangi loyihalar ustida birlashtiruvchi “g‘oyalar generatori” markaziga aylanishiga ishonch bildirdilar. Tadbir texnoparkning ilk rezidentlariga tegishli loyihalar ko‘rgazmasi bilan davom etdi.