15-mart kuni Oliy ta’lim, fan va innovatsiyalar vazirligi Hay’at yig‘ilishi ishtirokchilari Jizzax politexnika institutida tashkil etilgan Muqobil energiya manbalarini tadqiq etish ilmiy-amaliy markazi va Jizzax yoshlar texnoparki faoliyati bilan yaqindan tanishdilar. Prezident Shavkat Mirziyoyevning Jizzax viloyatiga tashrifi davomida berilgan topshiriq asosida tashkil etilgan ilmiy-amaliy markazda zamonaviy uskunalar o‘rnatilib, infratuzilma bilan to‘liq ta’minlangan. Markaz yiliga 4800 dona quyosh panellari ishlab chiqarish quvvatiga ega bo‘lib, hozirda ikki smenada 100 kVt quvvatli 200 dona quyosh panellari ishlab chiqarish imkoniyati yaratilgan. Shuningdek, professor-o‘qituvchilar va talabalar ishtirokida quyosh panellarini o‘rnatish bo‘yicha maxsus amaliy guruhlar shakllantirilgan. Shuningdek, Hay’at ishtirokchilari Jizzax yoshlar texnoparki faoliyati bilan tanishdi. Texnoparkda yiliga 500 nafar yosh mutaxassis zamonaviy yo‘nalishlar — veb-dasturlash, robototexnika, 3D modellashtirish, grafik dizayn, mexatronika, startaplar bilan ishlash kabi 10 dan ortiq yo‘nalishda o‘qitilishi yo‘lga qo‘yilgan. Texnopark hududida innovatsion g‘oyalarni prototip darajasiga yetkazish va kichik ishlab chiqarish zonasi ham faoliyat yuritmoqda.